UPI ගැන ඔබ නොදත් කතාව

ඉන්දියානු ඒකාබද්ධ ගෙවීම් ක්‍රියාවලිය හෙවත් UPI ක්‍රමවේදය ජනාධිපති රනිල් වික්‍රමසිංහ මහතාගේ සහ ඉන්දීය අග්‍රාමාත්‍ය නරේන්ද්‍ර මෝදි මහතාගේ ප්‍රධානත්වයෙන් මෙරටට හඳුන්වාදීම අද සිදුකෙරුණි.

මෙම ක්‍රමය යටතේ ඉන්දීය ගනුදෙනුකරුවන් සමඟ භෞතිකව මුදල් භාවිත නොකර සෘජුවම ඉන්දිය රුපියල් මගින් ගෙවීම් සිදු කළ හැකි වීම විශේෂත්වයකි.

2023 ජුලි මාසයේදී ජනාධිපති රනිල් වික්‍රමසිංහ මහතාගේ ඉන්දීය සංචාරය අතරතුර ඉන්දියාව සහ ශ්‍රී ලංකාව අතර භෞතිකව මුදල් භාවිතයෙන් තොර ඩිජිටල් ආර්ථිකයන් ප්‍රවර්ධනය කිරීම පිළිබඳ සාකච්ඡා පැවැත්වුණි.

එහි ප්‍රතිඵලයක් ලෙස ඉන්දීය ඒකාබද්ධ ගෙවීම් ක්‍රියාවලිය හෙවත් UPI ක්‍රමවේදය ශ්‍රී ලංකාව සමඟ සක්‍රීය කිරීම අද සිට ක්‍රියාත්මකය.

මෙම UPI ගෙවීම් පද්ධතිය මගින් දැනටමත් ඕමානය, එක්සත් අරාබි එමීර් රාජ්‍යය, නේපාලය සහ ප්‍රංශය යන රටවල් මූල්‍ය ගනුදෙනු සිදුකරන අතර ශ්‍රී ලංකාවට අමතරව මුරුසි රාජ්‍යයද අද ඊට එක්විය.

UPI ඉන්දීය ගෙවීම් ක්‍රියාවලිය, මෙරට ලංකා QR ගෙවීම් පද්ධතිය හා සම්බන්ධ කිරීමේ අවස්ථාව සඳහා වීඩීයෝ තාක්ෂණය ඔස්සේ ඉන්දීය අග්‍රාමාත්‍ය නරේන්ද්‍ර මෝදි සහ මුරුසි රාජ්‍යයේ අග්‍රාමාත්‍ය ප්‍රවීන්ද් ජග්නාත් යන මහත්වරුන් සම්බන්ධ වූ අතර ජනාධිපති රනිල් වික්‍රමසිංහ මහතා ඊට එක්වූයේ ජනාධිපති ලේකම් කාර්යාලයේ සිටය.

නිදසුනක් ලෙස ගතහොත් ශ්‍රී ලංකාවට පැමිණෙන ඉන්දිය සංචාරකයකුට මෙරට වෙළෙඳ ආයතන වෙත ගෙවීම් සිදුකිරීමේදීත් , මෙරට වෙළෙඳ අංශවලට ඉන්දියාව සමඟ සිදුකරන ගනුදෙනුවලදීත් භෞතිකව ඩොලර් හෝ මෙරට මුදල් භාවිත නොකර සිය ජංගම දුරකථනය මගින් ගිණුම්වලින් ගෙවීම් කළ හැකිය.

මෙහිදී සිදුවන්නේ ඉන්දිය ගනුදෙනුකරුවකු මෙරටදී සිදුකරන ගනුදෙනු භෞතිකව මුදල් භාවිත නොකර UPI ගෙවීම් පද්ධතිය හරහා තම බැංකු ගිණුම්වලින් පියවීමය.

Recommended For You

About the Author: Lanka Time Line

Leave a Reply

Your email address will not be published. Required fields are marked *